Assalamu’alaikum
wr. wb
Karaharjan
berkah dalah rahmat kagunganipun Gusti Ingkang Mirah mugi tansah tumedhak lan
tumanduk kajiwa kasarira dhumateng panjenengan sedaya dalasan kula sumrambah
dumateng kulawarga waradin sagung dumadi lestantun raharja
Ingkang
tuhu kinabekten para sesepuh myang pinisepuh ingkang tansah nindakaken mring
wewarahing kautaman kinarya tepa palupining putra wayah
Para
alim, para ulama ingkang rinten dalu tansah sinanding kitab suci wahyuning
Illahi, ingkang satuhu luhur ing budi
Para
kadang werda, madya, taruna sumrambah para kadang panawung kridha darma ingkang
tansah cinaket ing manah, tinangkep ing kekadangan saha tinangsulan raos
pasedherekan rinonce sekaring katresnan
Para
kadang sutresna budaya adiluhung ingkang tansah memetri mardawaning budaya
tulus ingkang pantes nampi pakurmatan
Para
tamu kakung saha putri ingkang dahat kinurmatan
Kalangkung
rumiyin sumangga kula dherekaken muji syukur konjuk dhumateng Gusti Ingkang
Maha Agung, nenggih Gusti Gung ingkang minangka sumbering sumber hanyumberi
sekabehing sumber, nenggih Allah SWT. Kacihna sampun mbabar kanugrahan ingkang
mawurahan, paring kekiyatan dalah kawilujengan satemah panjenengan sedaya
dalasan kula saged pepanggihan kempal manunggal ing papan menika kanthi
winengku ing suka dalah basuki
Rahmat
saking Allah SWT mugi tetep linuberna dhumateng priyagung paunggulaning
manungsa sesotyaning bumi mustikaning jagad: nenggih Nabi agung Muhammad SAW
dalah kulawarga sumrambah para sahabat, mugi saget lumuber dhumateng sagung
pandherek kalebet panjenengan sedaya dalasan kula, ingkang tansah hangantu-antu
payung pitulunganipun utawi syafa’atipun wiwit wonten donya dumugi ing dinten
kiyamat
Salajengipun
mugi wonten kepareng kula ........ saking ........... cumanthaka lumarap atur
satemah hangirangi kamardikan nyigeg anggenipun wawan pangandikan. Kula ingkang
kapiji minangka juru pangendali wara kinen handherekaken upacara wiwahan
dhauping penganten sarimbit, nenggih atmaja putrinipun bapa ...... ingkag
asesilih ........ kaliyan bagus ..... putra kakungipun bapa ...... ingkang lenggah
dedalem ing tlatah.....
Sanggyaning
tamu kakung saha putri ingkang tansah sinugata ing pakurmatan, wondene
reroncening adicara ingkang badhe hengrenggani upacara wiwahan dhauping
penganten sarimbit ing wekdal menika ingkang sampun rinancang, rinacik,
rinumpaka dening kulawarga sumrambah para kadang panawung kridha darma, nenggih
ingkang badhe katur mekaten:
1.
Titi laksana ingkang sepisan nenggih
pambuka
2.
Kalajengaken adicara ingkang urut kalih
nenggih lumarabing sri atmaja penganten putri ing sasana rinengga
3.
Ingkang rinacik ing adicara urut tiga
nenggih rawuhipun penganten kakung kalajengaken srah panampi
4.
Wondene adicara urut sekawan, upacara
adat panggihing penganten sarimbit
5.
Pamaosing ayat suci Al-Qur’an rinacik
ing adicara urut gangsal
6.
Ndungkap adicara ingkang urut enem,
nenggih atur pambagyaharja
7.
Kirabing temanten, rinonce ing adicara
urut pitu
8.
Saparipurnaning kirab, tumuli kalajengaken
adicara ingkang urut wolu nenggih wedharing sabdatama
9.
Lajuning upacara ndungkap adicara ingkang
urut sanga nenggih hastungkara utawi donga
10.
Wondene ingkang minangka pungkasaning
adicara nenggih panutup
Mekaten sagung tamu kakung saha putri, reroncening
adicara ingkang badhe angrenggani pawiwahan ing wekdal menika
Salajengipun kanthi tansah hanyadhong pangayoman
mring Gusti ingkang maha agung, mugi tumapaking gati wiwit purwa madya dumugi
wasana tansah pikantuk payung kawilujengan satemah lestantun raharja
Rehning sedaya sampun samekta tuwin satata miwah sri
atmaja penganten sarimbit ugi sampun purna nggenya ngrasuk busana temanten,
pramila adicara tumuli badhe kula wiwiti
Minangka
pambuka, kula ngaturaken sesanti “PAMIYAKING WARANA KINARYA SARANA HAMEMAYU
HAYUNING SASAMA”
Katur
dhumateng para tamu, kula dherekaken sekeca lenggah kanthi mardikaning
penggalih hangantu adicara salajengipun, nuwun.
Be the first to reply!
Posting Komentar